لو حد فينا فكر شوية صغيرين في حال البلد اللي قدامه ... هيلاقي ان التفكير محجور عليه ومفيش له مجال كبير ... هنلاقي بلدنا مربوطة بروابط تعوقها دايما عن التقدم
دايما اللي بيقود مسيرة التقدم هما الاشخاص اللي بيتمردوا على الروابط دي ... الناس اللي عقولهم متفتحة ... وعمرنا ما لقينا شخص من اللي نايمين في ظلام الجهل من ايام العصر الحجري طلع كده وسط الناس وقادهم للتقدم
الفرق بين الشخص العبقري والشخص العادي هو ان العبقري بيشوف الحاجة اللي شايفها الانسان العادي عادية على انها مش عادية ...
زمان لما كان انسان عادي بيلاقي ثعبان مثلا كان بيجري بسبب خوفه من المخلوق اللي هو مش متعود يشوفه ... أو ممكن يقتله عشان يخلص غيره من الناس من الشر اللي هو متوقعه من المخلوق ده
انما ساعتها لو كان انسان عبقري اللي شاف الثعبان ده كان هيعمل ايه ؟؟؟ طبعا مكنش هيجري ... أكيد كان هيفكر في المخلوق اللي قدامه ... ربنا خلقه ليه ؟ وايه الافادة اللي بيقدمها ؟ ويا ترى اقدر احمي نفسي من خطره ازاي لو اتعرضت ليه وعضني فعلا
العبقري كان هيفكر في حاجة قليل من الناس اللي كانوا ساعتها هيفكروا فيها ... وهو انه يقرب من المخلوق ده ويحاول يمسكه ويفكر يستخلص من السم بتاعه علاج
او ممكن يفكر في ان الثعبان ده ممكن ميكونش سام مثلا ... المهم انه كان هيفكر في اتجاه تاني خالص
طبعا انا مش قصدي على الايام دي ... الناس اليومين دول لو لقوا ثعبان هياكلوه
نيوتن لما شاف تفاحة بتقع على الارض استغرب وفكر ووصل لقانون الجاذبية ...
مع ان وقوع اي حاجة على الارض سواء تفاحة او غيرها بالنسبة للناس حاجة عادية
بعد كده عايزكم تقيسوا على ده اي شئ احنا بنشوفه عادي في نفس الوقت اللي المفكرين والعباقرة اللي موجودين في العالم شايفينه مش عادي
من اول ما طلعنا من بطون امهاتنا واحنا بنكبر بنشوف أد ايه المجتمع بتاعنا في تراجع ...
سياسة القمع والحجر على العقول وانعدام الحوار بين ناس كتير كانوا السبب في كده
اي حد بيطلع بفكرة جديدة تلاقي الناس بيقولوا لأ مينفعش ده عيب وده معرفش ايه وعاداتنا وتقاليدنا متسمحش بكذا وكذا والعيل الصغير لما يحب يتناقش يقولوله عيب يا ولد لما الكبير يتكلم تاخد الكلمة وتنكتم في بطنك وتسكت خالص ومش من الذوق ولا من عاداتنا ان الصغير يتكلم في وجود الكبير ... وحاجات تانية كتير أوي بتحصل
كل حاجة عادات وتقاليد ....
الحاجات دي كلها مبنية على اساس من الجهل مش موجودة في الدين ولا اسمع ان فيه دولة من الدول المتحضرة بترتبط بيها
اللي اعرفه ان عندنا ديننا متمثل في القرآن وسنة الرسول صلى الله عليه وسلم واجماع العلماء ... لو اتبعناه نبقا مشينا في الطريق الصحيح باذن الله ... ليه بقا نقيد نفسنا ونفسد حياتنا الحلوة بحاجات ملهاش اي لزمة ؟؟
العيب شئ نسبي من مجتمع لمجتمع ومن فرد لفرد جوا المجتمع نفسه ... والعادات والتقاليد دي أغلبها قائمة على الجهل ولازم نتخلى عنها ... مش هقول كلهم بقول الأغلب
واللي عايز يمشي على عادات وتقاليد ويرتبط بمبدأ العيب يبقا يطبقه على نفسه وبس وميقلبش دماغ الناس بيه
البلد مبقاش فيها دين اسلامي ومسيحي او حتى يهودي بس
البلد اتملت بالمذاهب سواء بهائية او شيعية او حتى ناس ملهمش دين ... لأ وكمان العادات والتقاليد دي غلبت الدين عند ناس كتير أوي والناس مبقتش عارفة دينها من كتر العادات اللي اتقيدوا بيها ... يعني من الاخر التقاليد دي حلت محل الدين عند ناس كتير وبقوا بيتبعوها
مبقاش فيه تقبل للحوار ولا للافكار الجديدة وبسبب كده الكل بيخبطوا في بعضهم ومحدش شايف التاني
من الاخر كل واحد فينا لو اتبع دينه ( دينه وبس ) هيلاقي كل حاجة صح هو نفسه فيها ومش هيتعب في الدنيا دي ... ويشيل من دماغه العادات والتقاليد اللي بهتت على الزمن دي
دلوقتي بقا في اخر الكلام ... انتوا ايه رأيكم في موضوع العادات والتقاليد ده ؟؟
ويا ترى نقدر نلغي الموضوع ده من حياتنا ازاي ؟!!!
موضوع: العادات والتقاليد ... مقياس تخلف الشعوب